龍門，需要腳法嗎？
一個好嘅Keeper 除左手法好，技術好。腳下功夫絕對唔少得。但其實好腳下功夫嘅訓練往往係我地最忽略嘅一環，除左由場區轉打龍門嘅朋友腳法會好啲，部分一開始打龍門嘅朋友相對會弱一啲，但好嘅腳法除左好過下下大腳解圍。就算後衛回傳比對手迫都冇有怕。當玩到前鋒投降，就係龍門最有成功感嘅時刻。
簡單擺脫嘅方法除左推橫「爆」贏前鋒，仲可以用假動作fake 佢，但前提有好嘅控球技巧。所以一啲簡單嘅控傳技巧要非常穩定，因為連個波都控制唔到，就唔使諗去擺脫對手。以下就有啲訓練建議比大家。
1.) 控球
無論地波，彈地波，高波都要練習。而且要多用腳內檔控球，因為面積大，控到個波機會都大啲，由最簡單嘅腳內檔控球開始練起，落練到可以唔控失就已經略有小成，就算後衛回傳啲彈彈波，高波都唔使怕啦，不過要留意嘅係唔好太「黐腳」，因為會好難再傳球，連盤球都難啲架。而且假如要轉向，個波太黐腳就難搞。
2.) 傳球
當控得好，就當然要識傳啦，除左大腳，傳球都係一個好選擇，因為大腳就未必確保控球權係自己隊友，比對手截左打反擊就唔好啦。相反短傳就可以令己方有控球權，再由後場「造波」上前場，現今足球都開始由後場組織攻勢，除非你啲隊友波底差，簡單一個地波就變得更容易控制，所以要練習將個波傳得貼地，傳得準。而且將兩隻腳練到控得傳得，初時可以由十碼距離開始練習，練得好就可以將距離加長，練到二十碼都傳得咁穩定已經好屈機架啦。至於點練，技巧係點，YouTube 就有好多片去教你。
3.) 盤球
入戲肉嘅時間，因為對手嘅迫搶多數都係一兩下，擺脫到就要立即傳球/解圍，避免自己玩失波鑄成大錯。例如可以練下假動作，或者可以試下扭下雪糕筒。之後搵啲隊友試下練習，模擬被迫搶嘅處理情況。練得得多就有信心。
總結:
好似片中嘅龍門扭得咁過癮，當然瀟灑到不得了。當中要足夠嘅練習，而且好多時係去到最後一刻先去扭，當中膽識，技術同冷靜缺一不可。呢個post 嘅想帶出嘅訊息唔係鼓勵龍門去扭前鋒，係鼓勵龍門練習手法等技術之外，仲要花時間練好腳下功夫。因為龍門係比賽入面真係咩情況都會有機會遇到，練多一樣野，當去到緊急關頭就可以救自己一命。而且一個好龍門，除左識接識撲之外。有好嘅腳下功夫就會更全面。你睇下雲達沙，紐亞，都係數一數二好腳法嘅龍門黎架。
#龍門係要有腳法 #救自己一命 #練下隻腳啦
Search